Wehi ʻŌlelo (kāmua)

No «hehele»

ʻākoakoa

[hehele] Ka hui nui ʻana o kekahi mau kānaka a holoholona paha ma kekahi wahi. Puke Wehewehe Hou

• Laʻana palapala:
  • I kēlā hōʻike ʻana ma mua, i ka makahiki 1833 i ka malama ʻo Maraki, i ia manawa ʻākoakoa mai nā haumāna ʻike a pau... Ka Lama Hawaii, 28 Pepeluali 1834
  • Ua piha ka hale pule i nā lā Kāpaki; ua ʻākoakoa nui mai nā mea pule kakahiaka, a ua nui nō hoʻi ka poʻe i noʻonoʻo i nā mea o ka ʻuhane me ka weliweli. Ke Kumu Hawaii, 26 Nowemapa 1834

ʻalakē

[hehele] Ka lele ʻana a kau koke ma luna o kekahi mea. Moʻolelo Hawaiʻi o Kalapana

• Laʻana palapala:
  • ʻAlakē aʻela ke keiki ma luna o kona paikikala a ʻo kona holo akula nō ia no ka hale me ka wikiwiki i hiki iā ia.

ʻalalā

[hehele] He kani uē nui e like me kā ke keiki, hipa, a puaʻa paha. Moʻolelo Polenesia

• Laʻana palapala:
  • Hoʻouna ʻia ke kanaka e kiʻi iā Hiʻiaka me ka puaʻa pū. Hoʻolohe mai ʻo Hiʻiaka, e ʻalalā aku ana ka puaʻa. Ka Hae Hawaii, 4 Iulai 1860
• Pilina:
  • E nānā pū iā pūʻalalā.

[hehele] He hoʻopuka ʻana i ka leo oli me ka waha hāmama i ʻano like ke kani me ka uē a ka pēpē a me ka hipa.

Lepe Kumuhana: mele/oli-KS

ʻanau

[hehele] Ka hele wale ʻana aku o ke keiki i ka holoholo mai ʻō a ʻō me kona mau hoa kamaliʻi; ka ʻauana a kiʻihele ʻana. Huaʻōlelo Makalei

• Laʻana palapala:
  • ʻAnau nō hoʻi ʻoe i kauhale. Hawaiian Dictionary (Pukui & Elbert)
  • Ua kīpē aku nā konohiki i kahi pōhaku māhanahana i nā luna, a ua ʻanau a keʻe aʻela ka hana a nā luna, a ua pili ke kaumaha i nā makaʻāinana kuaʻāina. Ke Aupuni Moʻī, ʻaoʻao 213

ʻanapa

[hehele] Ka māʻamaʻama hulali ʻana o kekahi mea i ka pā ʻana o ka lā a mahina paha; ka ʻōlapa ʻana o ka uila.

• Hoʻohana:
  • Kepela ʻokoʻa: ʻānapa, ʻanapu.
• Pilina:
  • E nānā pū iā ʻānapanapa.

ʻānapanapa

[hehele] Ka māʻamaʻama hulali nui ʻana o kekahi mea i ka pā ʻana o ka lā e ʻeha ai nā maka. Lehua ʻĀhihi : Makakēhau…

• Laʻana palapala:
  • Ua like me ka hau ke ʻānapanapa. Lehua ʻĀhihi : Makakēhau…
• Pilina:
  • Huaʻōlelo pili: ʻanapa.

ʻanapu

[hehele] Ka ʻanapa ʻana; ka hana a ka uila i ka lani. He Moʻolelo Kaʻao no Kekūhaupiʻo

• Laʻana palapala:
  • ʻAnapu maila kekahi lapa uila nui a halulu koke ana ka lani.
• Pilina:
  • Like pū me: ʻanapa.

ʻānuʻunuʻu

[hehele] He piʻi a iho pinepine ʻana o ka leo oli i waena o ʻelua kiʻeleo.

• Pilina:
  • Huaʻōlelo pili: olioli kānaenae.

Lepe Kumuhana: mele/oli-KS

ʻaʻā

[hehele] He ʻā ikaika ʻana; he ʻā ʻana o ke ahi ma kekahi mau wahi i ka wā hoʻokahi. He Moʻolelo Kaʻao no Kekūhaupiʻo

• Laʻana palapala:
  • …ua hoʻolei ʻia akula i ke kai, he mea e like me ke kuahiwi nui e ʻaʻā ana i ke ahi. Hōʻike ʻAna [Revelation], 8

Lepe Kumuhana: ao kūlohelohe

[hehele] Ka nānā wale nō o nā maka me ka ʻimo ʻole.

• Laʻana palapala:
  • E ʻaʻā pono iho ana hoʻi iā ia me ka ʻimo ʻole, ʻaʻole hoʻi ʻo ka minoʻaka. Lehua ʻĀhihi : Makakēhau…

ʻeu

[hehele] Ka ʻoniʻoni nui ʻana o nā mea kolo ma luna o kekahi mea, e laʻa me ka ilo.

• Laʻana palapala:
  • Ke ʻeu nei nā naonao ma luna o nā manakō palahū i hāʻule.

ʻemo

[hehele] Ka hala nui ʻana o ka manawa; ka liʻuliʻu. ʻO ka maʻamau, pākuʻi ʻia ʻo ʻole ma ka ʻikeoma ʻo ʻemo ʻole no ka hōʻike ʻana i ka pōkole o ka manawa i kō ai kekahi hana.

• Laʻana palapala:
  • ʻEleu nō ko laila, ua ʻoka au i ka meaʻai a ʻaʻole nō i ʻemo, ua mākaukau.
• Pilina:
  • E nānā pū iā ʻemo ʻole.

ʻeʻe

[hehele] Ke kau ʻana ma luna o kekahi mea, ʻo ka maʻamau he alakau, e like me ke kaʻa, moku, waʻa, a mea ʻano like aku.

• Laʻana palapala:
  • He pō Kāloa kēia, ua ʻeʻe pūpū. ʻŌlelo Noʻeau, 907
  • I ka ʻeʻe ʻana aʻe o nā ʻōhua ma luna o ka moku lele, ua hoʻokipa ʻia lākou e ke pailaka.

ʻiʻi

[hehele] 1. He hoʻopuka ʻana i ka leo oli ma ka pau ʻana o ke mele a ʻoki mele paha—ma “ē”—kahi e komo ai nā ʻano leo oli like ʻole e laʻa me ke kuolo, ka nonolo, ka haʻi, ke aeae, a me ka heʻu nahenahe. 2. He hoʻopuka ʻana i ka leo haʻalulu maʻamau o ke oli ʻana.

• Pilina:
  • Huaʻōlelo pili: kuolo.

Lepe Kumuhana: mele/oli-KS

ʻiʻi ikaika

[hehele] He pana ʻana o ka leo oli i ke komo ʻana o nā woela manaʻo ʻole ma ka huaʻōlelo hope o nā lālani pākahi a pau o ke mele hoʻāeae.

Lepe Kumuhana: mele/oli-KS

ʻiʻi hoʻānuʻunuʻu

[hehele] He pana ʻana o ka leo oli i ke kuapokuapo ʻana i ka haʻalulu me ka pālahalaha (haʻalulu ʻole) he mau manawa ma hoʻokahi huaʻōlelo. Aia kekahi ʻano ʻiʻi hoʻānuʻunuʻu ma ka lālani mua o ke mele. Aia nā mea ʻekolu koe ma ka huaʻōlelo hope o ka lālani mele kahi e haʻi ai, e aeae ai, a i ʻole e hoʻōki wale ʻia ai ka leo ma ka pau ʻana.

• Pilina:
  • Huaʻōlelo pili: oli kānaenae, oli ʻiʻi.

Lepe Kumuhana: mele/oli-KS